Instalación

Pode descargar a última versión do cliente de sincronización de escritorio de NextCloud desde a páxina de descarga de NextCloud. Hai clientes para Linux, macOS e Microsoft Windows.

As edicións do servidor compatíbeis actualmente son as tres últimas versións estábeis no momento da publicación. Isto quere dicir que a serie de edicións «latest» está a ser compatíbel coas versións estábeis maiores/principais do servidor. Consulte https://github.com/nextcloud/server/wiki/Maintenance-and-Release-Schedule para as versións principais compatíbeis.

A instalación en macOS e en Windows é a mesma que para calquera aplicación de software: descargue o programa e após prema dúas veces para iniciar a instalación e, a continuación, siga o asistente de instalación. Após que se instale e configure o cliente de sincronización manterase automaticamente actualizado; consulte O actualizador automático para obter máis información.

Os usuarios de Linux deben seguir as instrucións da páxina de descarga para engadir o repositorio axeitado para a súa distribución Linux, instalar a chave de sinatura e após empregar os seus xestores de paquetes para instalar o cliente de sincronización de escritorio. Os usuarios de Linux tamén actualizarán os seus clientes de sincronización a través do xestor de paquetes e o cliente amosará unha notificación cando estea dispoñíbel unha actualización.

Os usuarios de Linux tamén deben ter activado un xestor de contrasinais, como Gnome Keyring ou Kwallet, para que o cliente de sincronización poida acceder automaticamente.

Tamén atopará ligazóns a ficheiros de código fonte e versións máis antigas na páxina de descarga.

Requisitos do sistema

• Windows 10+ (só 64-bits)

• macOS 11.4+ (só 64-bits)

• Linux (ubuntu 22.04 ou openSUSE 15.5 ou …) (só 64-bits)

Nota

Para as distribucións de Linux, asistímolas, se é tecnicamente factíbel, as publicacións actuais de LTS. Para BSD, asistímolas, se é tecnicamente factíbel mais non as probamos

Personalizar a instalación de Windows

Se só quere instalar o cliente de sincronización de escritorio de NextCloud no seu sistema local, pode simplemente iniciar o ficheiro .msi e configuralo no asistente que aparece.

Funcionalidades

O instalador MSI fornece varias funcionalidades que se poden ser instaladas ou retiradas individualmente, que tamén pode controlar a través da liña de ordes, se está a automatizar a instalación, execute a seguinte orde:

msiexec /passive /i Nextcloud-x.y.z-x64.msi

A orde instalará o cliente de sincronización de escritorio de NextCloud na localización predeterminada coas funcionalidades predeterminadas activadas. Se quere desactivar, p. ex., iconas de atallo de escritorio, simplemente pode cambiar a orde anterior pola seguinte:

msiexec /passive /i Nextcloud-x.y.z-x64.msi REMOVE=DesktopShortcut

Consulte a seguinte táboa para obter unha lista de funcionalidades dispoñíbeis:

Funcionalidade	Enabled by default	Descrición	Propiedade para desactivala
Client	Si, obrigatorio	O cliente real (ou propiamente dito)
DesktopShortcut	Si	Engade un atallo ao escritorio	NO_DESKTOP_SHORTCUT
StartMenuShortcuts	Si	Engade un atallo ao menú de inicio	NO_START_MENU_SHORTCUTS
ShellExtensions	Si	Engade a integración con Explorer	NO_SHELL_EXTENSIONS

Instalación

Tamén pode optar por instalar o propio cliente empregando a seguinte orde:

msiexec /passive /i Nextcloud-x.y.z-x64.msi ADDDEFAULT=Client

Se, por exemplo, quere instalar todo, agás o DesktopShortcut e a funcion ShellExtensions, ten dúas posibilidades:

1. Nomear explicitamente todas as funcións que realmente quere instalar (lista autorizada) onde sempre está instalado Client:

   msiexec /passive /i Nextcloud-x.y.z-x64.msi ADDDEFAULT=StartMenuShortcuts
   

2. Pasar as propiedades NO_DESKTOP_SHORTCUT e NO_SHELL_EXTENSIONS:

   msiexec /passive /i Nextcloud-x.y.z-x64.msi NO_DESKTOP_SHORTCUT="1" NO_SHELL_EXTENSIONS="1"
   

Nota

O .msi de Nextcloud lembra estas propiedades, polo que non é preciso especificalas nas actualizacións.

Nota

Non pode usala para cambiar as funcionalidades instaladas, se quere facelo, consulte a seguinte sección.

Cambio de funcionalidades instaladas

Pode cambiar as funcionalidades instaladas máis adiante empregando as propiedades REMOVE e ADDDEFAULT

1. Se quere engadir o atallo de escritorio máis adiante, execute a seguinte orde:

   msiexec /passive /i Nextcloud-x.y.z-x64.msi ADDDEFAULT="DesktopShortcut"
   

2. Se quere retiralo, simplemente execute a seguinte orde:

   msiexec /passive /i Nextcloud-x.y.z-x64.msi REMOVE="DesktopShortcut"
   

Windows fai un seguimento das funcionalidades instaladas e usando REMOVE ou ADDDEFAULT só afectará ás funcións mencionadas.

Compare REMOVE e ADDDEFAULT na Guía do instalador de Windows.

Nota

Non pode especificar REMOVE na instalación inicial xa que desactivará todas as funcionalidades.

Cartafol de instalación

Pode axustar o cartafol de instalación especificando a propiedade INSTALLDIR así:

msiexec /passive /i Nextcloud-x.y.z-x64.msi INSTALLDIR="C:\Program Files\Non Standard Nextcloud Client Folder"

Teña coidado ao usar PowerShell en troques de cmd.exe, pode ser complicado conseguir que o espazo de branco escape alí. Especificar INSTALLDIR deste xeito só funciona na primeira instalación, non pode simplemente volver invocar o .msi cunha ruta diferente. Se aínda ten que cambialo, desinstáleo primeiro e reinstáleo coa nova ruta.

Desactivar as actualizacións automáticas

Para desactivar as actualizacións automáticas, pode pasar a propiedade SKIPAUTOUPDATE:

msiexec /passive /i Nextcloud-x.y.z-x64.msi SKIPAUTOUPDATE="1"

Executar após a instalación

Para executar o cliente automaticamente após a instalación, pode pasar a propiedade LAUNCH:

msiexec /i Nextcloud-x.y.z-x64.msi LAUNCH="1"

Esta opción tamén retira a caixa de selección para que os usuarios decidan se queren executar o cliente para o modo non pasivo/tranquilo.

Nota

Esta opción non ten ningún efecto sen interface gráfica.

Non reiniciar após a instalación

O cliente de Nextcloud programa un reinicio após a instalación para asegurarse de que a extensión do Explorador estea correctamente (des)cargada. Se está a coidar o reinicio Vde. mesmo, pode configurar a propiedade ``REBOOT`:

msiexec /i Nextcloud-x.y.z-x64.msi REBOOT=ReallySuppress

Isto fará que msiexec saía co erro ERROR_SUCCESS_REBOOT_REQUIRED (3010). Se a súa ferramenta de despregue interpreta isto como un erro real e quere evitalo, pode, en troques, querer definir DO_NOT_SCHEDULE_REBOOT:

msiexec /i Nextcloud-x.y.z-x64.msi DO_NOT_SCHEDULE_REBOOT="1"

Asistente de instalación

O Asistente de instalación levao paso a paso a través das opcións de configuración e dos axustes da conta. En primeiro lugar, ten que introducir a URL do seu servidor NextCloud.

Se xa ten unha conta nunha instancia de NextCloud, prema no botón Acceda ao seu Nextcloud. Se non ten unha instancia de NextCloud e unha conta alí, pode que queira rexistrar unha conta cun provedor. Nese caso prema en Crear conta co Provedor. Teña presente que o cliente de escritorio pode ter sido construído sen compatibilidade con provedores. Nese caso, non verá esta páxina. En troques, solicitaráselle a páxina seguinte.

Introduza a URL para a súa instancia de NextCloud. O URL é o mesmo URL que escribe no seu navegador cando tenta acceder á súa instancia de NextCloud.

Agora o seu navegador web debería abrir e pedirlle que acceda á súa instancia de NextCloud. Introduza o seu nome de usuario e contrasinal no seu navegador web e permita o acceso. Após, volva ao asistente. Teña en conta que pode que non necesite introducir o seu nome de usuario e contrasinal se xa está conectado co seu navegador.

Na pantalla de opcións de cartafol local, pode sincronizar todos os seus ficheiros no servidor NextCloud ou seleccionar cartafoles individuais. O cartafol de sincronización local predeterminado é NextCloud, no seu directorio persoal. Tamén pode cambiar isto.

Cando remate de seleccionar os seus cartafoles de sincronización, prema no botón Conectar na parte inferior dereita. O cliente tentará conectarse ao servidor NextCloud e, cando o teña conseguido, o asistente péchase. Agora pode observar a actividade de sincronización se abre o diálogo principal premendo na icona da área de notificación.